ទឹកជ្រះ អន្លង់ធំ-អន្លង់ខៀវ ព្រែកត្នោត ខេត្តកំពត

ទឹកជ្រះ អន្លង់ធំ-អន្លង់ខៀវ

ខេត្តកំពតមានសហគមន៍ទេសចរណ៍ចំនួន៤កន្លែង ដែលកំពុងដំណើរការនាពេលបច្ចុប្បន្នមានដូចជា: សហគមន៍ទេសចរណ៍ព្រែកត្នោត ( អន្លង់ធំ ) សហគមន៍ទេសចរណ៍ត្រពាំងសង្កែ សហគមន៍ទេសចរណ៍ កំពង់សាមគ្គី និងសហគមន៍ទេសចរណ៍បឹងអន្លង់ព្រីង។ សហគមន៍ទេសចរណ៍ដែលមានលក្ខណៈលេចធ្លោជាងគេក្នុងចំណោមហគមន៍ទេសចរណ៍ទាំងបួនមានចំនួន២សហគមន៍គឺសហគមន៍ទេសចរណ៍ត្រពាំសង្កែ និងសហគមន៍ទេសចរណ៍ព្រែកត្នោត ( អន្លង់ធំ ) ។

សហគមន៍អេកូទេសចរណ៍ព្រែកត្នោត មានទីតាំងស្ថិតនៅភូមិព្រែកក្រែង ឃុំព្រែកត្នោត ស្រុកទឹកឈូ ខេត្តកំពត និងមានចម្ងាយផ្លូវ១៧៨ គីឡូម៉ែត្រ តាមផ្លូវជាតិលេខ៣ ដែលស្ថិតនៅចន្លោះគីឡូម៉ែត្រលេខ ១៧៧ និង ១៧៨ ពីភ្នំពេញមកដល់ច្រកចូលសហគមន៍រួចបត់ស្តាំបន្តដំណើរតាមផ្លូវកា្រលគ្រួសក្រហមប្រមាណ ១៦០០ម៉ែត្រ ទើបដល់សហគមន៍អេកូទេសចរណ៍ព្រែកត្នោត ដែលមានទីតាំងស្ថិតនៅចន្លោះខេត្តព្រះសីហនុ និងទីរួមខេត្តកំពត។ ភ្ញៀវទេសចរអាចទៅដល់បានដោយឡានទេសចរណ៍ធំតូច តាក់ស៊ីក៏បាន។ សហគមន៍អេកូទេសចរណ៍ព្រែកត្នោតមានចម្ងាយ៣០គីឡូម៉ែត្រពីទីរួមខេត្តកំពត ភ្ញៀវទេសចរត្រូវធ្វើដំណើរតាមបណ្តោយផ្លូវជាតិលេខ៣ ភាគខាងលិច និង៧៥គីឡូម៉ែត្រពីខេត្តព្រះសីហនុ តាមបណ្តោយផ្លូវជាតិលេខ៤ កាត់តាមផ្លូវជាតិលេខ៣ ត្រង់ចំណុចផ្លូវបំបែកវាលរេញ ។

នៅពេលដែលបានមកដល់រមណីយដ្ឋានអន្លង់ធំនោះ យើងនឹងបានឃើញនូវ ទេសភាពដ៏អស្ចារ្យ ដែលយើងកម្របានឃើញពីមុនមកណាស់។ ទេសភាពទាក់ទាញបំផុតនៅរមណីយដ្ឋាននេះគឺយើងអាចមើលឃើញទេសភាពព្រៃដ៏ខៀវស្រងាត់នៅតាមបណ្តោយទឹកជ្រោះដែលហូរធ្លាក់មកពីលើកំពូលភ្នំបូកគោ ហើយទឹកបានហូរចុះមកគេចផ្ទាំងថ្មតូចធំ ដែលមើលទៅថ្លាឈ្វេងដូចកញ្ចក់ អមដោយហ្វូវមច្ឆាតូចធំ ហែលប្រដេញគ្នាគួរឱ្យគយគន់ក្រៃលែង ហូរចុះដល់ដៃសមុទ្យ។ រមណីយដ្ឋានទេសចរណ៍បែបធម្មជាតិមានទេសភាពស្អាត ទឹកថ្លា អាចហែលលេងកំសាន្តបាន និងចូលទៅដល់ព្រៃហួសទឹកធ្លាក់អន្លង់ធំយើងដើរកាត់ព្រៃនិងថ្ម នឹងទៅដល់អន្លង់ខៀវដែលជាអាងទឹកធម្មជាតិ ដ៏ថ្លាយង់ ពណ៌ខៀវស្រងាត់ និងត្រជាក់ស្រេង អាចអោយយើងលោតទឹកលេង និងហែលទឹកលេងនឹងបានបំភ្លេចនូវកង្វល់ដែលបានបន្សល់ទុក។ លើសពីនេះទៅទៀតយើងមានកញ្ចុះសម្រាប់អង្គុយញាំអាហារ និងអាចទស្សនាហ្វូងសត្វស្វាដែលជាសត្វបានអភិរក្សនៅក្នុងតំបន់មួយនេះ។ ដកស្រង់ពីទំព័រ http://visitkampot.info